د ناورین خطر کمول او بیړنی چمتووالی د روزنې لارښود اتمه برخه دریم درس

 5.8  په همغږۍ کې د غیردولتي سازمانونو او د ملکي خدمتونو ادارو رول

غیردولتي سازمانونه او د ملکي خدمتونو ادارې د ناورین د خطر کمولو او د چمتووالي په همغږۍ کې مهم رول لري، په ځانګړي ډول د ټولنې او ساحوي کچو کې.

د همغږۍ مهم رولونه په لاندې ډول دي:

·       د خطر ارزونو او د مخکیني خبرتیا معلوماتو شریکول

·       د همغږۍ په پلاتفورمونو کې فعاله ګډون

·       له سکتوري تګلارو سره د چمتووالي پلانونه همغږي کول

·       د ټولنې نظریات، اندېښنې او فیډبک رسول

·       د ټولنو او د لوړو کچو سیستمونو ترمنځ د اړیکو پیاوړتیا

ځايي غیردولتي سازمانونه او د ملکي خدمتونو ادارې ډېری وخت لاندې ځانګړنې لري:

·       له ټولنو سره قوي اړیکې

·       د ځایي خطرونو ښه درک

·       اغېزمنو سیمو ته چټک لاسرسی

دغه ځواکمنتیاوې د همغږۍ په بهیر کې د هغوی ګډون لا ارزښتمن کوي.
بېلګه:
د ملکي خدمتونو یوه ځايي اداره د ټولنې د څارنې له لارې د وچکالۍ د اغېزو لومړنۍ نښې پېژني. د همغږۍ په غونډو کې د دې معلوماتو شریکول د مخکیني اقدام بحثونه فعالوي او اغېزمنو سیمو ته پر وخت ملاتړ برابرېږي.

6.8  د معلوماتو شریکول او راپور ورکول

د معلوماتو شریکول د همغږۍ بنسټیزه دنده ده. دا د وضعیت د درک، پلان جوړونې او حساب‌ورکونې ملاتړ کوي.

هغه معلومات چې عموماً شریکېږي

·       د خطرونو او مخکیني خبرتیا معلومات

·       د خطر او زیان‌منېدنې ارزونې

·       د چمتووالي او احتمال پلانونه

·       د زیانونو او اړتیاوو ارزونې

·       د غبرګون فعالیتونه او پوښښ

معلومات باید په لاندې ډول وي:

·       کره او پر وخت

·       روښانه او منظم وړاندې شوي وي

·       د محرمیت او ساتنې ملاحظاتو ته درناوی کوونکي

د راپور ورکولو ملاحظات

راپور ورکول باید:

·       د حساسو شخصي معلوماتو له شریکولو ډډه وکړي

·       تر ممکنه بریده له منل شوو بڼو سره سمون ولري

·       پر تایید شوو معلوماتو ولاړ وي

·       د ټولنې لیدلوري هم منعکس کړي

بېلګه:
د سېلابونو پر مهال، ګڼ بنسټونه چټکې ارزونې ترسره کوي. د همغږۍ پلاتفورمونو له لارې د لنډیز شوو موندنو شریکول د اړتیاوو روښانه انځور برابروي او تشې په چټک ډول ډکېږي.

7.8  د همغږۍ عامې ننګونې او حل لارې

عامې ننګونې

·       د بنسټونو د ماموریتونو تداخل او د رولونو ناسمه روښانتیا

·       د همغږۍ په غونډو کې نابرابره او نامنظمه ګډون

·       د معلوماتو ډېرښت یا د ټیټ کیفیت معلومات

·       په فرعي کچو کې د همغږۍ محدود ظرفیت

·       د لاسرسي او اړیکو خنډونه

د ننګونو د حل عملي لارې

·       پر اړوندو او د عمل وړ معلوماتو تمرکز کول

·       په مناسبه کچه همغږي ترسره کول (ټولنه، ولسوالۍ، ولایت)

·       له روښانه محدودیتونو سره حتا د ناتکمیلو معلوماتو شریکول

·       له رسمي غونډو بهر د اړیکو او باور پیاوړتیا

·       د منل شوو اقداماتو مستندسازي او دوامداره تعقیب

همغږي یو دوامدار بهیر دی چې د باور، ثبات او ګډ هدف له لارې لا اغېزمنېږي.

8.8  د قضیې څېړنه: په ولایتي کچه د سېلاب د چمتووالي همغږي

پېښه

یو ولایت له موسمي سېلابونو سره مخ دی چې څو ولسوالۍ اغېزمنوي. په تېرو کلونو کې غبرګونونه ټوټه‌ټوټه وو او ځینې ټولنې په تکراري ډول له پامه غورځول کېدې.

د همغږۍ اقدامات

·       غیردولتي سازمانونه د خطر نقشې او د سېلاب سناریوګانې د همغږۍ پلاتفورمونو له لارې شریکې کړې

·       د چمتووالي رولونه د سکتورونو ترمنځ روښانه شول

·       د ټولنې د مخکیني خبرتیا معلومات له ولایتي پلان جوړونې سره ونښلول شول

·       چارواکو او بشردوستانه فعالانو د لومړیتوب ولسوالۍ په ګډه وټاکلې

پایلې

·       د چمتووالي فعالیتونه لا ښه هدفمند شول

·       د مرستو تکرار په څرګند ډول کم شو

·       مخکینی غبرګون چټک او لا همغږی شو

·       ټولنو ته روښانه، یو شان او پر وخت پیغامونه ورسېدل

زده‌کړې

·       مخکینۍ همغږي د چمتووالي اغېزمنتوب لوړوي

·       له ناورین مخکې د معلوماتو شریکول د غبرګون تشې راکموي

·       د ټولنې د کچې معلومات له لوړې کچې پلان جوړونې سره نښلول حیاتي ارزښت لري

لنډیز

دې برخې د افغانستان په شرایطو کې د ناورین د خطر کمولو او بیړني چمتووالي لپاره د همغږۍ او بنسټیزو چوکاټونو اهمیت تشریح کړ. چې پکې د ناورین د خطر کمولو ملي او فرعي ملي جوړښتونه، له چارواکو سره همغږي، او د بشردوستانه کلسټرونو رول بیان شو. همدارنګه د معلوماتو د شریکولو، د چمتووالي د همغږۍ او د ټولنې د نښلولو په برخه کې د غیردولتي سازمانونو او د ملکي خدمتونو مهم رول روښانه شو. د بېلګو او یوې قضیې څېړنې له لارې وښودل شول چې اغېزمنه همغږي د مرستو تکرار راکموي، د غبرګون کیفیت ښه کوي، او حساب‌ورکونه پیاوړې کوي.